Mwalongo Awataka Wadau Kushirikiana Kuenzi na Kuendeleza Urithi wa Mashujaa

RUVUMA | Februari 28, 2026

Katibu Mkuu wa TRAMEPRO Atoa Wito wa Kugeuza Historia ya Vita vya Maji Maji kuwa Fursa za Maendeleo

Katibu Mkuu wa Shirika la Tiba Asili na Uhifadhi wa Mazingira (TRAMEPRO), Boniventura Mwalongo, leo Februari 28, 2026, amesema kuwa historia ya mashujaa wa Vita vya Maji Maji inapaswa kuenziwa kwa vitendo kwa kuigeuza kuwa chachu ya maendeleo ya kijamii na kiuchumi.

Akizungumza katika maadhimisho ya Siku ya Mashujaa wa Vita vya Maji Maji yaliyofanyika Mkoa wa Ruvuma, Mwalongo alisema kuwa mashujaa hao walionesha ujasiri, umoja na uzalendo wa hali ya juu katika kupigania ardhi, heshima na utu wa Mwafrika.

“Damu ya mashujaa wa Vita vya Maji Maji ndiyo mbegu ya uhuru wetu. Ni wajibu wetu kuhakikisha historia yao haiishii kwenye kumbukumbu pekee, bali inakuwa sehemu ya maendeleo ya kizazi cha sasa na kijacho,” alisema Mwalongo.

Alisisitiza kuwa maadhimisho hayo yanapaswa kutumika kama jukwaa la kuhamasisha uwekezaji katika utalii wa kihistoria, tafiti za kisayansi pamoja na matumizi ya teknolojia katika kuhifadhi makumbusho na nyaraka muhimu za kihistoria.

“Tunaweza kugeuza maeneo ya kihistoria kuwa vivutio vya utalii, tukafungua ajira kwa vijana wetu na kuimarisha uchumi wa mkoa wetu. Hii ndiyo njia bora ya kuwaenzi mashujaa wetu,” aliongeza.

Aidha, aliwataka wadau mbalimbali kushirikiana katika kuhifadhi mazingira na kuendeleza tiba asili kama sehemu ya kulinda na kuenzi urithi wa taifa.

Maadhimisho ya Siku ya Mashujaa wa Vita vya Maji Maji Mkoa wa Ruvuma yameendelea kuwa kumbukumbu muhimu ya historia ya mapambano dhidi ya ukoloni, huku yakihamasisha kizazi cha sasa kujivunia utamaduni na urithi wao.

“Mashujaa wetu, tunawaenzi leo na milele,” alihitimisha Mwalongo.