Absa Yatambuliwa kama Mwajiri Bora kwa Mwaka 2026 katika Masoko Sita ya Afrika

*Absa Ghana yashika nafasi ya kwanza kama Mwajiri Bora katika soko lake

Kwa mwaka wa tano mfululizo, Absa imetambuliwa kama Mwajiri Bora (Top Employer) kwa mwaka 2026 na Taasisi ya Top Employers (TEI), kufuatia tathmini huru ya mbinu zake za usimamizi wa rasilimali watu katika nchi sita za Afrika ambazo ni Botswana, Ghana, Kenya, Afrika Kusini, Zambia na Mauritius. Katika mafanikio ya kipekee, Absa Ghana pia imefanikiwa kushika nafasi ya kwanza kama Mwajiri Bora katika soko lake.

Kwa ujumla, Absa imepata alama ya asilimia 93.66% katika ngazi ya kundi, ikiongezeka kutoka asilimia 90.15% mwaka 2025 na kuzidi kwa kiasi kikubwa kiwango cha kimataifa cha asilimia 85.9%. Masoko yote yalipata alama za jumla zilizo juu ya asilimia 87, huku Absa Bank Botswana ikirekodi ongezeko kubwa zaidi la mwaka hadi mwaka la asilimia 5.53. Ghana iliongoza kwa kupata alama ya juu zaidi ya jumla ya asilimia 97.38%, huku maboresho makubwa pia yakishuhudiwa nchini Kenya na Afrika Kusini, kila moja ikiongezeka kwa asilimia 4.94. Absa Bank Zambia nayo iliongeza alama zake kwa zaidi ya asilimia 4, ikidhihirisha dhamira thabiti ya Absa katika sera na mifumo inayomlenga mfanyakazi.

Kupata ithibati hii katika masoko yote sita kunathibitisha ufanisi wa mbinu ya Absa katika usimamizi wa rasilimali watu ndani ya sekta ya huduma za kifedha barani Afrika, kwa kuzingatia viwango vya kimataifa.

Akizungumza kuhusu mafanikio hayo, Afisa Mkuu wa Rasilimali Watu wa Kundi la Absa, Jeanett Modise, alisema mabadiliko makubwa yanaendelea katika namna watu wanavyoutazama kazi, hali inayobadilisha uhusiano kati ya waajiri na wafanyakazi. “Mashirika lazima yawe wazi na makusudi kuhusu thamani wanayotoa—kuanzia dhamira na utamaduni wa kazi hadi fursa za ukuaji na unyumbufu—wakati huohuo yakieleza kwa uwazi viwango, uwajibikaji na utendaji yanayotarajiwa. Uwazi huu ni muhimu katika kujenga imani, kuvutia vipaji bora na kuunda mazingira ya kazi ambayo watu wanaweza kustawi kikamilifu,” alisema Modise.

Aliongeza kuwa Absa imejikita katika kuboresha namna inavyofafanua na kuwasilisha pendekezo lake la thamani kwa wafanyakazi, ili liendane na uhalisia wa jinsi watu wanavyotaka kufanya kazi na kujenga taaluma zao. “Kutambuliwa kama Mwajiri Bora kwa mwaka wa tano mfululizo ni uthibitisho huru kwamba mkabala huu unawagusa wafanyakazi wetu na unatekelezwa kwa uthabiti katika masoko yetu yote.”

Kwa upande wake, Charles Russon, Mtendaji Mkuu wa Absa anayesimamia Kanda ya Afrika, alisema kuongezeka kwa idadi ya masoko ya Absa yanayopata ithibati ya Mwajiri Bora ni ushahidi mkubwa wa mkakati wake wa kumweka mtu kwanza kazini. “Tunajivunia kwa kiasi kikubwa mafanikio ya Absa Ghana kama Mwajiri Bora namba moja katika soko lake. Hili linaonyesha kina cha uwezo wetu wa uongozi, nguvu ya utamaduni wetu wa kazi, na uwekezaji wetu wa makusudi kwa watu wetu kote katika kanda, ili kuwahudumia vyema wateja wetu,” alisema.

Moja ya matokeo muhimu ya tathmini hiyo ni Absa kupata alama kamili ya asilimia 100 katika maeneo ya Mkakati wa Biashara, Uongozi na Utendaji, jambo linaloonyesha uthabiti mkubwa katika jinsi mkakati unavyotekelezwa kupitia uongozi na utendaji wa shirika. Absa pia ilifanya vyema katika Maadili na Uadilifu, ikipata alama ya asilimia 99.49%, juu ya kiwango cha kimataifa kwa asilimia 1.45 na karibu asilimia 2 juu ya kiwango cha sekta. Alama ya Mazingira ya Kazi ilipanda hadi asilimia 98.41%, zaidi ya asilimia 10 juu ya wastani wa kimataifa na karibu asilimia 8 juu ya kiwango cha sekta.

Maboresho makubwa zaidi ya mwaka hadi mwaka yalirekodiwa katika michakato ya kuondoka kazini (+18%), utofauti, usawa na ujumuishi (+11.34%), zawadi na utambuzi (+8.78%), uendelevu (+7.35%), pamoja na chapa ya mwajiri (+5.28%).

TEI ni mamlaka ya kimataifa katika kutambua ubora wa mbinu za usimamizi wa rasilimali watu. Kupitia Mpango wake wa Ithibati unaotambulika duniani kote na unaotumia uchambuzi wa takwimu, TEI husaidia kampuni kuboresha mikakati yao ya kuvutia, kukuza, kuhusisha na kubakiza vipaji.

Maendeleo yaliyoshuhudiwa katika tathmini ya mwaka huu yamechangiwa na mkabala makini zaidi unaotumia takwimu katika kuelewa uzoefu wa wafanyakazi. Absa imeendelea kuimarisha mifumo yake ya kusikiliza maoni ya wafanyakazi, kwa kuanzisha vigezo bora zaidi vya kulinganisha na uchambuzi wa kina unaotoa mwanga juu ya viwango vya imani na ushiriki ndani ya shirika. Hatua hizi zimewezesha kuingilia kati kwa ufanisi zaidi pale panapohitajika, kuboresha uzoefu wa mfanyakazi katika hatua zote za ajira, na kuimarisha utamaduni wa uwazi na uwajibikaji.

Aidha, Absa imeongeza uwekezaji katika maendeleo ya uongozi kupitia mifumo iliyoboreshwa na mbinu za ufundishaji, jambo lililoimarisha uthabiti katika utekelezaji wa mkakati. Wakati huohuo, kundi limeendeleza juhudi zake katika ujumuishi, maendeleo ya ujuzi na mbinu za kubakiza vipaji kwa kutumia takwimu, kuhakikisha kuwa uwezo muhimu unajengwa na kudumishwa kwa muda mrefu. Hatua hizi kwa pamoja zimechangia maboresho ya jumla yaliyoonekana katika masoko yote na kuimarisha utendaji wa Absa katika tathmini hiyo.

“Kutambuliwa kwa mwaka wa tano mfululizo kunatupa mtazamo wazi wa jinsi utamaduni wetu na mbinu zetu za rasilimali watu zimekua kwa muda,” alisema Modise. “Tukiwa tumejipanga kulingana na mkakati wa kundi, tunaendelea kujitahidi kuwa karibu zaidi na wateja wetu, kwa kuwawezesha wafanyakazi wetu kutoa huduma bora. Tumekuwa makusudi katika kuimarisha pendekezo letu la thamani kwa wafanyakazi, tukilenga ubora wa kazi, uongozi, fursa za kujifunza na kukua, pamoja na ustawi wao.”

Alimalizia kwa kusema, “Msingi huu unaendelea kuunda aina ya mazingira ya kazi tunayojenga kwa ajili ya siku zijazo, mazingira yanayokidhi mahitaji ya dunia inayobadilika ya kazi na yanayoweza kuvutia na kukuza vipaji ambavyo shirika letu linavitegemea, vipaji vinavyotekeleza kusudi letu la kuiwezesha Afrika ya kesho, pamoja, hatua moja baada ya nyingine.”